Сөт җитештерүне арттыручыларга субсидияләр бирелә башлый

Авыл хуҗалыгы һәм азык-төлек министрлыгы хәбәр иткәнчә, хуҗалыкларга товарлыклы сөт җитештерүне 1 килограмм исәбеннән арттырган өчен федераль бюджеттан һәм республика бюджетыннан өстәмә субсидияләр бирелә башлый. Моның өчен федераль бюджеттан 213 млн сум, республика бюджетыннан 68 млн сум акча карала.

Субсидияне бүлү тәртибе түбәндәгечә: акча ай саен биреп барылачак; 1 августтан тәүлеккә сөт җитештерүне арттыруга ирешкән хуҗалыкларга иң югары сортлы бер килограмм сөт өчен 5 сум түләнә; җитештерү күләмен киметмичә саклап калганда - килограммына 4 сум; җитештерүне 1 процентка киметкәндә - 3 сум; 2 процентка - 2 сум; 3 процентка - 1 сум түләү карала. 3 проценттан күбрәк киметкән очракта субсидия бирелми.
Һәр айда җитештерелгән сөт күләме үткән ай белән чагыштырылып барыла. Беренче сортлы сөт бәясе методикада каралганча саклана.