Тукай районында «Игътибар – балалар!» профилактик чарасы башланды

Балаларны юл-транспорт һәлакәтләреннән саклау максатыннан 15 майдан районда «Игътибар - балалар!» профилактик чарасы старт алды. Ул 5 июньгә кадәр дәвам итәчәк, дип белдерә район ЮХИДИ бүлеге башлыгы Шамил Ганиев.

2017 елның дүрт аенда республика юлларында 16 яшькә кадәрге балалар катнашында 141 һәлакәт теркәлгән, аларда 2 бала үлгән, 146 бала тән җәрәхәтләре алган. Узган елның шушы чоры белән чагыштырганда аварияләрнең дә, үлүчеләрнең һәм сәламәтлегенә зыян алучыларның да бераз кимүе күзәтелә. Район территориясендә исә быел балалар катнашында 2 һәлакәт булган, аларда 2 бала зыян күргән. Соңгы вакытта җәяүле балалар катнашындагы юл-транспорт һәлакәтләренең дә кимүе күренә, ләкин моңа карап һич тә тынычланырга ярамый, диләр юл хәрәкәте иминлеге инспекторлары. Статистикадан күренгәнчә, барлык һәлакәтләрнең өчтән бере җәйге каникуллар чорында килеп чыга. Мәсәлән, узган җәй Татарстан юлларында 7 баланың гомере өзелгән, 181 бала сәламәтлегенә зыян алган.

Профилактик чара барышында район ЮХИДИ инспекторлары балигъ булмаган пассажирларның автомобильдә алып барылуына, йөртүчеләрнең җәяүле балаларга юл бирүләренә, җәяүле балаларның кагыйдәләрне үтәүләренә аерата игътибар бирәчәкләр, ата-аналар белән очрашулар узачак, җәйге лагерьларда юл хәрәкәте куркынычсызлыгының торышы тикшереләчәк.

Дәүләт автоинспекциясе искә төшерә: балаларны транспортта алып бару кагыйдәләрен үтәмәү йөртүчегә 3000 сум күләмендә штраф салуга, җәяүле балага юл бирмәү 1500 сум күләмендә штраф салуга китерә.

Кагыйдәне бозган җәяүле балалар да полиция игътибарыннан читтә калмый. Республикада дүрт айда шундый 5 меңләп балага карточкалар төзелгән инде.

Юл хәрәкәте иминлеге инспекторлары баласының куркынычсызлыгын тәэмин итүгә ата-аналарның бик җитди карауларын сорыйлар. Искә төшерәбез: 12 яшькә кадәрге балалар автомобильдә махсус утыргычларда, аннан өлкәнрәкләр каеш эләктереп кенә йөрергә тиешләр.