Штрафны вакытында түләвең хәерле

admin, 22 май 2018 - 06:10

1215

Хәзерге көндә Тукай районы территориясендә юл йөрү кагыйдәләрен бозган өчен штрафларын вакытында түләмәгән 335 кеше исәпләнә. Бүген штраф суммалары кечкенә түгел, шул ук вакытта аларны бар кеше дә «бәхет хаты» алган көнне үк түли дә алмый. КоАПта билгеләнгәнчә, штраф карар үз көченә кергәннән соң 60 көн эчендә түләнергә тиеш. Шуңа өстәп, карардан риза булмаучылар өчен 10 көн кабат карау срогы бирелә.

Түләмәгән штраф ике елдан юкка чыга, дигән сүзләр дә дөрес түгел. Юл йөрү кагыйдәләрен бозган өчен штраф түләү вакыты 90 көннән артканнан соң, сезнең эш суд приставларына тапшырыла. Шулай итеп, әҗәтне кайтару белән алар шөгыльләнә башлыйлар. Шуны да онытмагыз, штрафны вакытында түләмәү тагын да зуррак чыгымнарга китерә. Сезгә бу очракта штраф суммасын икеләтә арттырып түләргә туры киләчәк яки сезне 50 сәгатькә кадәр мәжбүри эшләргә тартачаклар, яисә 15 тәүлеккә кадәр кулга алачаклар, шулай ук чит илгә чыгуны чикләячәкләр, дип кисәтәләр район ЮХИДИ бүлегеннән.