Полицейкий пистолетыннан атылырга теләгән Чаллы кешесен суд җәзага тарткан

Полиция хезмәткәреннән табель коралын сорап, пистолеттан атылырга теләгән, коралны бирмәгәч йодрыклары белән ташланган Чаллы кешесен суд җәзага тарткан. Бу хакта шәһәр суды хәбәр итә.

Гадәттән тыш хәл 19 июньдә Чаллының “Автозавод” полиция бүлегендә килеп чыккан. Бүлек старшинасы турникет янында басып торганда, аңа табель коралын сорап, пистолеттан атылырга теләвен белдергән исерек кеше килеп эндәшкән.

Полицейский ир-аттан бинадан чыгып китүен сораган һәм аны озатырга чыккан. Шул чакта ир-ат йодрыклары белән полицейскийга ташланган, йөзенә һәм иңнәренә суккан.

Полиция хезмәткәренә һөҗүм иткән һәм үзенә кул салырга теләгән ир-ат шартлы рәвештә ярты елга ирегеннән мәхрүм ителгән.