Гриппка каршы 1300 доза вакцина кайтты

admin, 13 сентябрь 2018 - 08:35

1106

Район үзәк дәваханәсе белгечләре сентябрь аен гриппка каршы көрәшүнең иң кулай вакыты дип бәяли. Организмда әлеге авыруга каршы тора алырлык иммунитет формалашып өлгерү өчен вакцинадан соң берничә ай вакыт кирәк. Шуның өчен дә район баш табибы Галим Сабирҗанов тукайлыларны вакытында прививка ясатып калырга чакыра.

1 сентябрь көнне дәваханәгә 1300 доза вакцина кайткан инде. Якын арада өлкәннәр өчен тагын 1700, ә балалар өчен 500 вакцина килүе көтелә. Прививканы медицина хезмәткәрләре поликлиникада, амбулатория-ФАПларда ясый. Бигрәк тә балалар, хроник авырулы өлкәннәр, көмәнле хатын-кызларга прививка ясатуны кичектермәскә кирәк, дип кисәтә баш табиб.
Вакцинацияләү чорында тукайлыларның 17 меңгә якын өлешен гриппка каршы коралландыру планлаштырыла. Бу халык арасында чиргә гомуми каршы торучанлык формалаштыру өчен кирәк.