Бурыч кимеми

admin, 27 гыйнвар 2021 - 09:10

870

Федераль салым хезмәтеннән алынган мәгълүматлар буенча 2021 елның 1 январена тукайлыларның салымнар буенча 45,6 млн сум бурычы булган.

Бүгенгә ул сан 43,7 млн сум тәшкил итә. Аның 27,6 млн сумы – транспорт салымы, 9,3 млн сумы – җир, 6,8 млн сумы милек салымы. 25 көндә бурыч нибары 1,9 млн сумга гына кимегән. Әҗәтләрне киметү буенча иң түбән күрсәткечләр Сәмәкәй, Биклән, Иштирәк авыл җирлекләрендә, дип белдерде хакимияттә үткән эшлекле киңәшмәдә район башкарма комитеты җитәкчесенең икътисад һәм эшкуарлыкны үстерүгә ярдәм итү буенча урынбасары вазифаларын башкаручы Фәрит Заһретдинов.
Бурычларның иң күбе Кече Шилнә җирлегендә – 9 млн 501 мең сум. Арттан икенче урында – Әҗмәкәй җирлеге. Биредә халык барлык төр салымнар буенча 4 млн 190 мең сум бурычлы. Мәләкәс авыл җирлегендә исә бурыч 3 млн 239 мең сум.
Салым бурычларын җыюны тизләтү максатыннан оештырылган район комиссиясе үз эшен дәвам итә. Дүшәмбе-сишәмбе алар Князево, Кече Шилнә авыл җирлекләрендә булдылар, бүген Бәткедә, пәнҗешәмбе-җомга Иске Дөреш һәм Яңа Троицкида эшлиләр.