«Безнең Олимпия сәламе» конкурсында бордылылар өченче урынга чыкты

Күптән түгел «Безнең Олимпия сәламе» дип исемләнгән сәламәтлек театрларының IX республикакүләм конкурсы булып узды. Бәйгенең максаты - укыту оешмаларында физкультура-тернәкләндерү һәм спорт эшчәнлеге аша сәламәт яшәү рәвешен алып баруга өндәү. Аның зона этабында районыбыздан 3 мәктәп мактаулы исемгә лаек булды. Конкурс лауреатлары дип Мәләкәс һәм Мусабай-Завод урта мәктәпләре табылды. Борды сәламәтлек театрының җитәкчесе - тәрбия эшләре буенча директор урынбасары Энҗе Чернова һәм педагог-оештыручы - Юлия Утяшова белән 9-11 сыйныфларда укучы балалар Олимпия уеннарына багышланган 17 минутлык видеоролик әзерләгәннәр. Конкурска тапшырылган 139 эш арасыннан бордылылар өченче урынга чыга алган, алга таба алардан тагын да зур җиңүләр көтеп калабыз.