Тагын бер җиңү!

admin, 27 гыйнвар 2021 - 13:10

980

22-24 январь көнне Зәй шәһәрендә Ринат Фәрдиев истәлегенә көрәш буенча бөтенроссия ярышлары узды. Әлеге чарада 38 команда вәкилләре көч сынашты. Үз авырлык категорияләрендә 2001 елгы Илназ Рамазанов (75 кг), 2005 елгы Нияз Сәрвәров (50 кг) беренче урынга лаек булды.

Илназ Рамазанов бүгенге көндә билбау көрәше буенча спорт мастеры һәм көрәш буенча спорт мастеры исеменә кандидат. «Көндәшләр көчле иде, аеруча Түбән Кама, Мари-Элдан килгән егетләр белән көрәш җитди булды. Карантин вакытында ярышлар үткәрелмәү сәбәпле, тренировкага күбрәк игътибар бирергә, ныклы әзерлек белән килергә мөмкинчелек булды», – дип уртаклашты Илназ.
Егетләр Тукай районы спорт мәктәбенең Биклән бүлекчәсендә югары квалификацион категорияле тренер Марат Мөхәммәдиев җитәкчелегендә шөгыльләнә. Хәзер алар февраль аенда узачак Муса Җәлил исемендәге турнирга әзерлек белән мәшгуль.