Иске Гәрдәле буасы ремонтлана

Иске Гәрдәленең Үзәк урамы белән Заречная урамын зур булмаган күл аерып тора. Бер урамнан икенчесенә авыл уртасындагы һәм авыл башындагы ике күпер аша йөриләр. Чыннан да, язгы ташу чорында биредә ел саен проблемалар булмый калмый. Уртадагы күпер бер генә машина сыярлык, бик тар. Аны авыл халкы запастагы чыгу урыны кебек кенә тота. Ә төп юл югары очтагы күпер аша. Менә шушы күперне узган елның язында агып китүдән чак кына саклап кала алганнар иде инде. Ул вакытта, аптырагач, су шуннан аксын өчен, "Татарстан коммуналь челтәрләре"нә күпер өстеннән шактый зур ерым ачарга туры килгән иде. Буага капиталь ремонт ясарга кирәклеге шул вакытта иң мөһим мәсьәләләрнең берсе булып каршыга килеп басты да инде. Быел аны төзекләндерү буаларны һәм гидротехник корылмаларны ремонтлау буенча 2012-2014 елларга исәпләнгән республика программасына кертелде. Проект буенча, биредә 4 млн 900 мең сумлык эш башкарылырга тиеш. Подрядчы оешма итеп "Татмелиоводстрой" җаваплылыгы чикләнгән җәмгыяте билгеләнде. Оешманың җитәкчесе Вахит Гыйздәтуллинның әйтүенчә, быелга ул акчаның 300 мең сумы бүлеп бирелгән. Эш язгы ташулар үткәннән соң, агымдагы елның апрель аенда башланган. Иң беренче эш итеп буа төбендәге су торбасына яңа ачу-ябу җайланмалары куелган, коелар эшләнгән, авария булганда кулланыла торган махсус зур торба автомат режимга көйләнгән. Ягъни буадагы суның күләме тиешледән арта икән, су юлы автомат рәвештә ачыла, аннары үзе ябыла. Шулай ук күпер якынча алты метрга киңәйтелгән, хәзер юлның киңлеге 10 метрдан артык. Шулай ук ул биегәйтелгән. Вахит Вагыйзовичның әйтүенчә, күпер әле тагын 1 метр тирәсе күтәртеләчәк. Аннары вак таш җәеләчәк. Шулай ук биредә янгын сүндерү машиналарына төшеп су алу өчен махсус юл ясау, су тутыру җайланмалары көйләү планлаштырыла. Җайланмалар сатып алынган инде, урнаштырасы гына кала.

Узган яз, күперне ташу алып китмәсен өчен, суны көздән үк агызып калдырганнар иде. Авыл халкы ул вакытта янгын куркынычсызлыгы ягыннан да, каз-үрдәкләргә дә су кирәк, авылда бер буасыз булмый бит инде дип бик борчылды. Вахит Гыйздәтуллинның әйтүенчә, буа төзекләнеп беткәч, су елына ике мәртәбә кыска гына вакытка агызып алыначак, аннары ел дәвамында күл тулы торачак. 2012 ел язы кабатланган очракта да су күпер өстеннән чыкмаячак дип ышандыра подрядчы оешма җитәкчесе.

Эш башланган икән, ахырына кадәр җитәр, күп еллар кабатланып килгән проблема артта калыр дип ышана Заречная урамы халкы. Ниһаять, без дә язгы-көзге пычракларда яхшы юлдан йөрербез дип өметләнәләр алар.