Өч һәлакәттә дүрт кеше җәрәхәтләр алды, ике кеше үлде

автор, 26 декабрь 2014 - 12:47

909

Кичә Яр Чаллы - Сарман трассасының бишенче километрында «ВАЗ-2107» машинасын йөртүче 46 яшьлек ир-ат тизлекне арттыру аркасында идарә итүне югалтып каршы як полосага чыга һәм «Fiat Doblo» белән бәрелешә. Нәтиҗәдә авариядә гаепле ир-ат һәм аның ике пассажиры (Тукай районының Шөкрәле авылында яшәүчеләр) баш мие җәрәхәтләре һәм башка имгәнүләр алып больницага озатылалар. ЮХИДИ инспекторлары әлеге юл һәлакәтен теркәп торган вакытта шул ук урында тагын бер авария була. Шулай ук Тукай районында Калиновка авылында яшәүче 44 яшьлек хатын-кыз бозлавыкта идарә итүне югалтып, каршыга килүче машина белән бәрелешә. Әлеге хатын-кызның машина йөртү стажы бер ел гына була. Баш мие җәрәхәтләре алып, кабыргалары сынып ул БСМПга озатыла.

Шул ук көнне Яр Чаллы - «Дизелист» бакчачылык ширкәте юлындагы юл-транспорт һәлакәте ике кшенең үлеме белән тәмамлана. «ВАЗ-21140» автомобилендә «Дизелист»ка таба баручы 36 яшьлек ир-ат тизлекне арттыру аркасында каршы юлга чыга һәм «БМВ» машинасына бәрелә. Һәлакәт вакытында алган җәрәхәтләрдән Яр Чаллыда яшәгән 55 һәм 51 яшьлек ике ир-атның гомере өзелә. Ә гаепле йөртүче үзе баш мие җәрәхәтләре ала, күкрәк, кабырга һәм арка сөякләре сына, икенче дәрәҗә травматик шок ала. «БМВ» машинасын йөртүче 37 яшьлек хатын-кызга урында медицина ярдәме күрсәтелә, ул больницага ятудан баш тарта.