Бәйрәм кәефе кырылмасын

автор, 25 декабрь 2013 - 04:25

1059

Район ЮХИДИ хезмәте юл хәрәкәтендә катнашучыларның барысын да Яңа ел белән котлый һәм бәйрәм алдының яхшы кәефе ел дәвамында саклансын өчен юл йөрү кагыйдәләрен үтәргә чакыра.

Кызганычка каршы, бәйрәм чорында эчкән килеш руль артына утыручылар да арта, ә бу үз чиратында юл һәлакәтләренең дә күбәюенә китерә. Яңа елның беренче көннәре балаларның кышкы каникул вакыты да бит әле ул. Аек һәм игътибарлы машина йөртүче балалар тупланган урынны да, аларның кинәт килеп чыгарга мөмкин булуын да чамалый, ә алкоголь кулланып руль артына утырган кешегә «диңгез тубыктан». Ул бала гомерен өзәрмен, я булмаса сабыйның сәламәтлегенә зыян китерермен дип уйлап та карамый.

Исерек килеш руль артына утырган машина йөртүчегә Административ хокук бозулар турындагы кодексның 12.8 маддәсе нигезендә ел ярымнан ике елга кадәр машина йөртү хокукыннан мәхрүм ителү һәм 30 мең сум күләмендә штраф яный.

Юл хәрәкәте иминлеге хезмәткәрләре шулай штрафларны вакытында түләп, яңа елга бурычларсыз керергә чакыра. Юл йөрү кагыйдәләрен бозган өчен штрафларны түләү вакыты 30 көннән 60 көнгә арттырылса да, бурычлылар кимеми. Түләнмәгән штраф суммасы Кодексның 20.25 маддәсенең 1 өлеше нигезендә икеләтә арттырыла (ләкин 1000 сумнан да ким түгел) яки хокук бозучы 15 тәүлеккә кадәр кулга алына, яисә 50 сәгатькә кадәр мәҗбүри эшләргә тартыла.