Тыл хезмәтчәннәренә – үзенчәлекле бүләк

Ләүхә стилендә эшләнгән, бик мәгънәле сүзләр язылган кулъяулыклар инде әзер. Ләүхә – шамаилнең бер төре. Аерма шунда: ләүхәгә дога түгел, матур сүзләр языла. Аны икенче төрле «язмыш тактасы» дип тә атыйлар. Бу үзенчәлекле бүләкләр тыл хезмәтчәннәренә укучы балалар белән берлектә әзерләнгән бәйрәм митингында тапшырылачак. Гадәти булмаган әлеге сувенирлар яшүсмерләрдә патриотик хисне, өлкәннәргә карата хөрмәтне тагын да арттырыр дип ышанасы килә. Бүгенге тыл ветераннарының дәһшәтле сугыш чорында 13-14 яшьлек үсмер бала булуларын һәм аларның зурлар белән бер дәрәҗәдә фронт өчен хезмәт куюларын яшь буын тарих дәресләреннән укып белә.
Матур башлангыч дәвам итәр, киләсе елга да өлкәннәребезгә күркәм бүләкләр әзерләрбез дип уйлыйм. Бәлки башка үзенчәлекле вариантлар да барлыкка килер.

Алсу ГАБДЕЛХАКОВА.
Мусабай Завод авылы.