Суганны сарымсак үскән түтәлгә утыртмагыз

Белгечләр белдерүенчә, туфракның азыкка ярлылануы, ягъни берьяклы уңдырышсызлану килеп чыкмасын өчен чәчү әйләнеше үткәреп торырга кирәк. Яшелчәләргә нинди туклыклы матдәләр кирәк булуына карап, аларны утыртуны чиратлаштыралар.

Бәрәңгене, мәсәлән, кыяр, кузаклы үсемлекләрдән соң утыртсаң, яхшы уңыш алына. Шулай ук, чөгендер, кишер, суган үскән түтәлләргә утыртырга мөмкин, ә помидор, борыч, баклажан артыннан утыртырга киңәш ителми.

Сарымсак белән суганны бәрәңге, кузаклылар, кыяр, кишер, кәбестә, чөгендер, помидордан соң үстерергә яраса, борыч, физалис, сарымсак белән суганнан соң утырту тыела.

Помидор төсле кәбестә, суган, кишер, кыяр, чөгендер, яшел тәмләткечләрдән соң яхшы уңыш бирә. Аны бәрәңге, физалис түтәлләрендә үстерергә ярамый.
Кыяр, кабак, патиссон, ташкабак кебек яшелчәләрне борчак, башка кузаклылар, бәрәңге, кәбестә, помидор, суганнан соң чәчәргә киңәш ителә. Ә менә ташкабак белән кабактан соң, яңадан шул урында үстерү ярамый.

Кишерне суган, кыяр артыннан чәчү мул уңыш бирә, шулай ук редис, чөгендер һәм кәбестә артыннан үстерү дә начар булмас.

Яшел тәмләткечләрне (укроп, петрушка, салат, сельдерей, шпинат, базилик, майоран) кәбестә, кыяр, кузаклылар, бәрәңге, суган, помидор үскән түтәлләрдә яхшы уңыш бирәчәк. Кишер белән пастернактан соң үстерү киңәш ителми.

Баклажан кебек җылы як яшелчәсен шалкан, кыяр, арбуз, кавын, борчак, суганнан соң утырту яхшы булыр, томат белән борыч урынына гына ярамас.

Фото: proroslo.ru