Сосновый Бор поселогында авыл спортчылары көч сынашты

Сосновый Бор поселогының «Яшьлек» спорт комплексында муниципаль районның III спартакиадасы үтте. Ул Авыл хужалыгы һәм эшкәртү сәнәгате хезмәткәрләре көненә багышлап оештырылган иде. Спартакиадада «Гигант», «Вилданов», «Кама-Бекон», «Биклән» һәм Сәйдәшев исемендәге хуҗалыклар, «Чаллы-Бройлер» җәмгыяте эшчеләре һәм Теләнче Тамак авылы хезмәтчәннәре катнашты. Көрәш, өстәл теннисы, армспорт, гер күтәрү, яткан килеш ату, аркан тартышу кебек ярышларда барлыгы 51 кеше көч сынашты. Спартакиада ахырында җиңүчеләр билгеле булды. I урында - «Гигант» хуҗалыгы спортчылары, II һәм III урыннарны «Чаллы-Бройлер» җәмгыяте һәм «Вилданов» крестьян-фермер хуҗалыгы хезмәткәрләре яулады.