Районның иң күп ашлык суктыручылары Президент премиясенә дәгъва кыла

3 августтан республикада «Татарстан Республикасының иң яхшы комбайнчысы» дигән конкурс игълан ителгән иде. Аның кысаларында республикада иң югары күрсәткечләргә ирешкән 200 кеше 100әр мең сум премия белән бүләкләнәчәк. Премияләрнең 150се бөртек суктыручы комбайннар экипажларына, 50се теземнәргә салучыларга (уручыларга) биреләчәк. Әлеге конкурста район игенчеләре дә катнаша. Премиягә дәгъва кылучылар, комбайннарның төренә карап, дүрт төркемдә көч сынаша. Авыл хуҗалыгы һәм азык-төлек идарәсеннән алынган мәгълүматлар буенча, 15 август иртәсенә өченче төркемдә, «Акрос», «Нью Холланд», «Джон Дир», «Клаас Тукано» төрендәге комбайннарда лидерлар рәтендә «Кама» агрофирмасыннан Айрат Җаббаров, Рәҗәп Низамов, Фәйзелхак Сафин. Икенче төркемдә «Дон-1500» тибындагы комбайннарда, «Чаллы яшелчәсе+» хуҗалыгыннан Ринас Яруллин һәм Александр Коршунов, беренче төркемдә, «Нива» комбайнында, «Вилданов» крестьян-фермер хуҗалыгыннан Фирзәр Шәфыйков.