Өлкәннәрнең күңелен күрделәр

Яңа поселогы мәдәният йортында Өлкәннәр көне уңаеннан «Кереп барам гомер көзләренә» дип исемләнгән чара үтте. Бәйрәм яшь пенсионерларны өлкәннәр сафына кабул итеп, дипломнар тапшыру белән башланып китте һәм җыр, бию, нәфис сүз осталары чыгышлары белән үрелеп барды. Авыл үзешчәннәре бу юлы да Яңа поселогы халкы өчен сюрприз әзерләгәннәр иде: «Ахирәтләр» клубы әгъзалары «Ике сугыш арасы - һич төзәлми ярасы» исемле (автор һәм режиссер Н. Абдуллина) драма әсәрен сәхнәләштерделәр. «Каенкай» бакчасы сабыйларына (музыкаль җитәкчесе Г. Кәримова), урта мәктәп укучыларына (җитәкчесе А. Гаязова), авыл үзешчәннәренә, клуб хезмәткәрләренә зур рәхмәтләр укый-укый авыл халкы зур канәгатьләнү белән өйләренә таралды, дип хәбәр итте мәдәният йортының сәнгать җитәкчесе Н. Абдуллина.