Лениногорскидан – җиңү белән

Лениногорск шәһәрендә Советлар Союзы Герое Иван Заварыкин истәлегенә багышланган грек-рим көрәше буенча XXXII республика турниры үтте. Ярышларда 1997-2006 елгы яшүсмерләр көч сынашты. Районыбыз данын Круглое Поле һәм Кнәз егетләре яклап чыкты. Үз авырлыклары буенча Нурислам Әхмәдов һәм Азамат Гайнетдинов I урыннарны яуладылар. Егор Имакаев II урынга лаек булды. Егетләрнең тренеры - Рафаэль Гыйззәтуллин. Ярышларның призер исемен Кнәздән Ринат Баһаветдинов белән Артем Миникаев алды, дип хәбәр итте район балалар һәм яшүсмерләр спорт мәктәбе директоры Виктор Булатов.