Кай арада мәчетне яңартканнар?!

– Дөньяны изгелек яшәтә бит. Синең бит ул турыда бик тә дөрес язылган шигырең дә бар. Иҗат кичәң дә «Изгелек яшәтә дөньяны» дип аталган иде. Бу бик дөрес! Безнең авылдашлар арасында да бар андый киң күңелле, юмарт, җылы куллы, алтын йөрәкле кешеләр! Менә бу матур таш юлны салуда Өлфәт Барый улы Гыйльманов белән аның тормыш иптәше Сәрия ханым матди ярдәм күрсәтсә, матур калай коймаларны сатып алырга акчаны авылдашыбыз, мәчетебезгә, авылдашларга һәрчак хәерхаһлы Рафис Вәли улы Мостафин бирде. 
– Әле мәчет эчен дә матур, уңайлы зур диваннар белән җиһазлагансыз?
– Әйе, мәчеткә йөрүчеләргә уңайлы булсын дип уйладык та мәчеттә җыелган хәер акчаларына сатып алдык җиһазларны, – диде Мөдәфис хәзрәт.
Сокланмаслыкмыни? Чыннан да, изгелек яши тирәбездә, изгелек күңелләрне күтәрә, изгелек өмет уята.
Матди ягы бер, ә бит ул биргән акчаларга чималын сатып алырга, эшләргә дә кирәк. Бикләнлеләр анда да актив һәм бердәм. Бу саваплы эшләргә өлеше кергән һәркемгә Аллаһ Тәгаләнең чиксез рәхмәтләре яусын. 
Безнең мәчет – бөтен авылыбызның йөзен ачып торучы изге йортыбыз. Анда кеше күбрәк тартылган саен, иман, әдәплелек тәрбиясе дә артыр. Мөдәфис хәзрәт эшне оештыручы да, матди чыгымнар артыннан йөрүче дә. Халык хөрмәтен казану җиңел эш түгел, ул аны тырыш хезмәте белән яулады. Авыл бит ул зур бер гаилә кебек – бар да күз алдында. Бикләнебез, авылдашларыбыз турында һәрчак шундый яхшы хәбәрләр генә килеп торсын, дип телим мин. 
Рәзинә Сәетгәрәева.
/ Фотолар автордан алынды.