Тукай районының «Ирек» хуҗалыгында чәчүгә орлык әзерлиләр

Район хуҗалыкларында язгы кыр эшләренә әзерлек дәвам итә. Игенчеләр язгы кыр эшләрендә, чәчүдә катнашачак бар төр техниканы барлый. Хуҗалыкларда терлекчелек тармагы турында да онытмыйча, көндәлек эшләрне башкарып баралар.

- Әлеге көндә тагылмалы техниканы төзәтеп бетердек инде, тракторларның ремонты белән мәшгульбез. Моннан кала, орлыкчылык белән шөгыльләнүче хуҗалык буларак, орлык чистарту, аны сатуга әзерләү буенча эш башкарабыз. Шөкер, заказларыбыз бар. Курган, Саратов өлкәсеннән, республикадан да орлык сорап киләләр, - ди «Ирек» хуҗалыгының баш хисапчысы Фәрит Хөсәенов.

Яңа елдан техникага кирәкле запас частьларның, ашлама, ягулык-майлау материалларына булган бәяләрнең артуын искә алганда, орлык бәяләре дә кыйммәтләнгән. Ләкин, Фәрит Хөсәенов әйтүенчә, әлеге арту әллә ни зур түгел.