Чит телләрне өйрәнү – заман таләбе

Шушы көннәрдә безнең районның чит тел укытучылары өчен «Телләр өйрәнүдә укучыларның белем сыйфатын үстерү» темасына семинар булды. Ул Теләнче Тамак урта мәктәбендә түгәрәк өстәл рәвешендә узды.

Мәктәпнең методик берләшмәсе җитәкчесе Г. Арсланова укытучыларны мәктәптә телләр укыту юнәлешендә алып барылган эшләр белән таныштырды. Килгән кунакларга укытучы Ч. Әхмәтшина икенче сыйныфта «Инглизчә укырга өйрәнәбез» темасына һәм Г. Борһанова сигезенче сыйныфта сингапур методикасына нигезләнгән «Китаплар һәм уку» темасына дәресләр бирделәр.

«Түгәрәк өстәл»не район чит тел укытучыларының методик берләшмәсе җитәкчесе Ч. Әхмәтшина башлап җибәрде. Ул берләшмәнең эшенә анализ ясады, имтиханнар, олимпиадалар нәтиҗәләре, алда торган бурычлар турында сөйләде. Шилнәбаш урта мәктәбе укытучысы Э. Шәехова БДИга әзерләнүдә яңа технологияләр куллану, укучыларны телдән сөйләргә өйрәтү үрнәкләренә басым ясады. Районның информация-методик үзәге методисты Э. Вагыйзова һәр укытучының эшчәнлегенә бәя бирде, үз өстеңдә эшләүнең никадәр мөһим икәнлеген искәртте. Җитди сөйләшүне йомгаклап, район мәгариф бүлеге башлыгы урынбасары В. Шакирова бу очрашуның нәтиҗәле булуын әйтте, куелган бурычларның тиешенчә үтәләчәгенә ышанычын белдерде, дип хәбәр иттеләр Теләнче Тамак урта мәктәбеннән.