Бер көндә 3400 төп агач утырттык

"Агач утырту көне" дип аталган республика акциясе кысаларында безнең районда да 3400 төп агач утыртылды. Бу әһәмиятле чара бүген Круглое Поле, Бәтке, Новотроицкое, Түбән Суыксу һәм Теләнче Тамак авыл җирлекләрендә үтте. Әлеге эшкә 250ләп кеше җәлеп ителде. Агач утыртырга авылларның бюджет хезмәткәрләре, торак-милекчелек ширкәтләрендә эшләүчеләр, мәктәп укучылары чыкты. Яшелләндерү акциясе кысаларында районда тагын 60 мең төп чыршы һәм 15 мең төп тирәк утырту планлаштырыла. Әлеге үсентеләрдән торган яңа урман полосалары Яңа поселогы юлында һәм Калмаш белән Күзкәй арасында барлыкка киләчәк.