«Айбагыр» Кашкатауга кунакка барды

Әлеге коллективның бу бәйрәмдә беренче генә катнашуы түгел. Бу юлы да аларны зәйлеләр бик җылы итеп каршы алды. Безнекеләр, үз чиратларында, Питрау кунаклары алдында матур итеп чыгыш ясадылар. Ансамбль башкарган керәшен җырлары тамашачыларның көчле кул чабуларына күмелде. Бәйрәмнән истәлекле бүләк – чәй сервизы белән кайтты коллективыбыз. 
Кашкатау итәгендәге быелгы бәйрәм, һәрвакыттагыча, бик күңелле узды. Без татар эстрадасының танылган җырчылары Вера Васильева, Зөлфия Шакирова, Светлана Минеева, Вадим Захаров, Владимир Васильев, Илсөя Бәдретдинованың һәм башкаларның чыгышларын тыңлый алдык. 
Бәйрәмдә һәр елдагыча Питрау чибәре билгеләнде, «Питрау квасы», «Питрау себеркесе», «Иң үзенчәлекле квас ашы», «Иң халыкчан балык ашы» кебек кызыклы бәйгеләр үткәрелде, спорт уеннары оештырылды.

Тамара Тузеева фотосы.