Алдынгыларга бүләкләр

Мирһади Разов, 12 гыйнвар 2022 - 14:25

490

Район башлыгы Фаил Камаев уку алдынгыларын, олимпиадаларда җиңүләр яулаган, җәмәгать эшләрендә актив катнашкан һәм мәдәният, спорт өлкәсендә уңышларга ирешкән укучыларны Яңа ел белән котлады. Балаларны, аларның укытучыларын, ата-аналарын ул Чаллының «Энергетик» мәдәният сараена җыйды.

– Сез укуда алдынгылар, спортта югары уңышларга ирешкән, сәнгатьтә булдыклы балалар. Сез районыбызның һәм республикабызның киләчәге. Без сезнең белән горурланабыз, – диде Фаил Камаев. – Сезне укыткан мөгаллимнәргә, тәрбияләп үстергән әти-әниләргә зур рәхмәт.
Тукай районының алдынгы балаларын котларга РФ Дәүләт Думасы депутаты Әлфия Когогинаның ярдәмчесе Надежда Абдрахманова да килгән иде. Ул бүгенге бәйрәмгә чакырылган һәр балага депутаттан бүләк тапшырылачагын белдерде.
Район җитәкчесе, һәр баланың кулын кысып, рәхмәт хатлары, дипломнар һәм бүләкләр бирде. Быел район башлыгы бүләкләрен 100 укучы алды. Бүләкләнүчеләр арасында республика күләмендә үткән олимпиадаларда, бәйгеләрдә җиңү яулаган балалар да шактый иде.
Бүләкләү тантанасы районыбызның талантлы балалары чыгышлары белән үрелеп барды. Соңыннан «Земляничка» балалар театры балаларга үзенең «Яңа ел тамашасы» дип аталган чыгышын бүләк итте.
/ Рөстәм Зәкиев фотолары.