“Ак каен”да музыка залы ачылды

Бакча бинасының бу дүртенче канатында элек авыл җирлеге урнашкан булган. Алар мәктәп бинасына күчкәч, 60 квадрат метрлы бу бүлмәне музыка залы итеп үзгәртү өчен ремонт эшләре башланган. Төзекләндерү, яңарту эшендә төп ярдәмче Түбән Суыксу җирлегендә урнашкан "АвтоСтрой" оешмасы булган. Залны ачу тантанасында әлеге фирма вәкилләре дә катнаштылар һәм киләчәктә дә нәниләргә кулларыннан килгәнчә ярдәм итәргә ышандырдылар. Яңа залга шулай ук "Тукай азык-төлек корпорациясе" келәм алып биргән, әти-әниләр тюль бүләк иткәннәр. Обой ябыштыру, буяу кебек эшләрне бакча хезмәткәрләре үзләре башкарганнар.