Тукай районы Боерган авылынан Райнур Шамилов технология буенча Бөтенроссия олимпиадасында катнашты

Казанда технология буенча мәктәп укучыларының Бөтенроссия олимпиадасының региональ этабы узды. Анда 7 нчедән алып 11 сыйныфка кадәр 200 дән артык укучы катнашты. Тукай районының данын Боерган мәктәбенең 9 сыйныф укучысы Райнур Шамилов яклады. Бу чараның бурычы - сәләтле укучыларның теоретик һәм практик белемнәрен, иҗади проектларын бәяләү. Теоретик биремнәрне үтәүгә бер сәгать, практик өлешкә өч сәгать вакыт бирелә. Һәр катнашучы үз эшен дә алып килергә тиеш. Райнур агачтан үзе ясаган люстра алып барган. Бүген җиңүчеләрне бүләкләү тантанасы белән олимпиаданың төбәктәге этабы тәмамланды.