Куш-Елгага «Ашыт җыены»на бардык 

Нинди генә авыр еллар булса да, Куш-Елгада «Ашыт җыены» һәрвакыт уздырылган. Бүген мәдәният йорты директоры Ралия Әхмәдуллина аны кабат торгызу һәм җанландыру эшенә алынган. Ралия ханым җыенның традицияләрен элеккеге еллардагы кебек сакларга, йолаларын югалтмаска, югалганнарын кайтарырга тырыша.
Җыен авыл Сабан туе уза торган аланлыкта үтте. Менә шушы матур бәйрәмдә катнашу өчен безне Зәй районыннан махсус автобус килеп алды. Бәйрәм башында без дә, Куш-Елга халкы белән бергә, «Урак бәйрәме» дип аталган чарада катнаштык. Җыенда авылның күренекле кешеләре һәм игелекле эшләрнең башында торучылары нәселләре белән мәйдан уртасына чакырып хөрмәтләнде. Без дә, үз чиратыбызда, аларга матур жырларыбызны бүләк иттек. Алар белән бергә биедек, күңел ачтык. Куш-Елгада яшәүчеләр безне шулкадәр җылы каршыладылар, җырчыбыз Ләйлә Сөләйманованы кабат-кабат сәхнәгә чакырдылар. Коллективларыбызга рәхмәт хатлары тапшырдылар.
 Бәйрәмнән барыбыз да шундый зур канәгатьләнү хисләре белән кайттык, кабат очрашулар насыйп булсын дип теләдек, дип яза редакциягә Сәмәкәй мәдәният йорты директоры Альфира Исхакова.

Фото Альфира Исхакова тарафыннан бирелде.