Ике машинага арест салынды

Район ЮХИДИ инспекторлары суд приставлары белән берлектә узган атнада рейдка чыктылар. Алар юл йөрү кагыйдәләрен үтәмәгән өчен 10 мең сумнан артык бурычы булган тукайлыларның өйләрендә йөрделәр. Искә төшерәбез, бу төр штрафлар суд карары үз көченә кергәннән соң 60 көн эчендә түләнергә тиеш.

Рейд вакытында Мәләкәс һәм Түбән Суыксу авылларында яшәүче ике машина йөртүченең автомобильләренә арест салынды. «ВАЗ-2114» һәм «ВАЗ-2112» машиналары Менделеевскига җибәрелде.

Мондый рейдлар алга таба да атна саен үткәрелер дип планлаштырыла, шуңа күрә машина йөртүчеләрнең штрафларын түләүгә җитди караулары сорала, дип кисәтә район ЮХИДИ бүлеге башлыгы Шамил Ганиев.