«Вконтакте»  аша алданган

Бу турыда атналык киңәшмәдә хәбәр ителде. Җинаятьче интернет аша «әнисен җирләргә» дип акча җыйган. Зыян күрүче акчасын мошенникларга үз куллары белән күчергән.
Мәләкәс авылында яшәүче 48 яшьлек ир-ат автомобилендә музыкасын нык көчле уйнаткан өчен 24 яшьлек күршесенә кисәтү ясаган. Ахырдан бәхәс кул күтәрүгә әйләнгән. Нәтиҗәдә 24 яшьлек ир-ат: «Мине кыйнадылар, җинаять эше кузгатыгыз», – дип полициягә хәбәр иткән. 
Урлау очраклары буенча узган атна дәвамында өч җинаять эше кузгатылган. Түбән Суыксудан 42 яшьлек ир-атның гаражыннан газ котелы урлаганнар. Оператив-эзләү чаралары вакытында бу гамәлне кылуда гаепләнеп, 58 яшьлек ир-ат тоткарланган. Калмаш авылында зират яныннан генератор урлап киткәннәр. Бу җинаятьтә Чаллыда яшәүче ике кеше гаепләнә. Берсе тоткарланган, икенчесен эзләү бара. Урланган милек шәһәрнең бер ломбардыннан табылган. Өченче очрак – «Ордиушка» бакчачылык ширкәтендәге бер йорттан милек урлау. Бу җинаятьтә гаепле дип табылган 50 яшьлек чаллылы бер тәүлек эчендә тоткарланган. Милек карактан алынган. 
Юл йөрү кагыйдәләрен бозуның 230 очрагы теркәлгән. 4 кеше руль артына исерек килеш утырган, 2 кеше машина йөртү таныклыгы булмаган килеш йөргән, куркынычсызлык каешын эләктермәгән 63 кешегә карата беркетмә төзелгән.