Санкт-Петербургтагы шартлау нәтиҗәсендә 14 кешенең гомере өзелгән

Кичә, 3 апрель көнне көндезге 14.00 сәгатьтә Санкт-Петербург шәһәре метросында шартлау булды. Шуның нәтиҗәсендә 14 кешенең гомере өзелде. 11 кеше урында ук һәлак булса, 3 кеше алган җәрәхәтләрдән җан биргән. Шартлау «Сенная» станция платформасында һәм «Технологический институт» станциясе янында вагонда булган.

Татарстан Республикасы Президенты Рөстәм Миңнеханов кичә булган террорчылык акты белән бәйле Санкт-Петербург губернаторы Георгий Полтавченкога телеграмма юллады. Бу хакта Президентның матбугат хезмәте хәбәр итә.

«Петербург метросында булган шартлау белән бәйле тирән кайгыгызны уртаклашам. Гаепсез кешеләрнең үлеме - зур кайгы һәм туганнар, якыннар өчен кайтарып булмаслык югалту, әлеге бәлага юлыкканнарга кайгыларын уртаклашу һәм ярдәм сүзләрен җиткерүне сорыйбыз. Әлеге куркыныч вакыйгада зыян күрүчеләргә тизрәк сәламәтләнүләрен телибез», - диелә телеграммада.

Санкт-Петербургта өч көнлек матәм игълан ителде.