Салкын тидерүчеләр кимегән, ләкин тынычланырга иртә

Роспотребнадзор идарәсенең территориаль бүлеге башлыгы урынбасары Марат Гыйрфановның хәбәр итүенчә, узган атнада райондашларның вируслы инфекцияләр белән чирләү очраклары ике мәртәбә кимегән. Барлыгы 123 шундый очрак теркәлгән. Авыручыларның күпчелеге балалар - 84 кеше. Әлегә бездә мәктәпләрнең карантинга ябылу фактлары юк, ләкин күрше Минзәлә районында аерым сыйныфларда укуны вакытлыча туктатырга туры килгән очраклар бар, дип әйтеп үтте ул.

Каты эчәк инфекциясе ике балада һәм өч өлкән кешедә теркәлгән.

Өч кешене хайваннар тешләгән. Казиледә пенсионерны йорт мәчесе, Иске Дөрештә мәктәп укучысын, Суровкада пенсионерны шулай ук эт тешләгән. Яңа поселогында бер кешенең В гепатиты йөртүе ачыкланган, эпидемиягә каршы чаралар үткәрелгән.