Регина, без синең белән!

Бәла агач башыннан йөрми, адәм башыннан йөри, диләр. Әйе, хак сүзләр. Матур гаиләдә – Ринат hәм Резеда Аптеевлар гаиләсендә бәләкәч сабыйлары Регина авырый. Табиблар 1 яшьтә 3 айлык кызга арка мускуллары артрофиясе диагнозын куялар. 
Белгечләр аңлатуынча, бу куркыныч чир. Башта авыру кешенең аяклары хәлсезләнә, соңыннан кеше утыра алмый башлый, әкренләп кулларының көче бетә, ә ахырдан инде сулый да алмас дәрәҗәгә җитә.
Әлеге чир безнең илдә дәваланмый, ә чит илдә аңа каршы дару бар. Тик бәясе 45 миллион сум (!) тора. Укытучы Резеда hәм заводта эшләүче Ринат Аптеевлар гаиләсе өчен, әлбәттә, бу күтәрә алмаслык зур акча.
Аптеевлар гаиләсенә килгән авырлыкка колак салып, аларга ярдәм итү йөзеннән ТНВ журналисты Илшат Әюпов Чаллы татар дәүләт драма театрында «Регина, без синең белән!» дип аталган хәйрия концерты оештырды. Җырчылар Азат hәм Алина Кәримовлар, Алия hәм Илнур Сәхбетдиновлар, Гөлназ Закирова, Равил Галиев, «Болгар» бию театры солистлары кызчыкка ярдәм итәргә теләк белдерде. Концерт барышында hәм театр фойесында оештырылган ярминкә ярдәмендә бу көнне барлыгы 90 мең сумга якын акча җыелды. Әлеге сумма Регина Аптееваны Израильдә дәвалау өчен тотылачак.
– Кызыбыз язмышына битараф булмаган алтын йөрәкле hәр кешегә без зур рәхмәтлебез. Шөкер, дөньяда игелек кылучы кешеләр бар, үзләре дә сау-сәламәт булсыннар, – дип тели Регинаның әнисе Резеда Аптеева.

Фото Резеда Аптеева тарафыннан бирелде.