Кызганыч, алданрак белмәдек...

Олы Шилнә поселогына керүче бу микрорайон 5 ел элек кенә төзелә башлаган. Бүген биредә дүрт урам, 100 йорт бар, барлыгы 400гә якын кеше яши. Яңа төзелешләргә хас булганча, биредә инфраструктура проблемасы актуаль. Ә иң «авырткан» мәсьәлә – юл проблемасы иде, диләр манхеттенлылар.
Үзара салым җыю программасы 2014 елдан бирле эшләсә дә, Манхэттенда яшәүчеләр 2018 елга кадәр анда катнашмаган. «Аның үзенчәлекләренә дә төшенмәдек, аңлатучы кеше дә булмады», – диләр.
Бәхеткә, поселокта активистлар төркеме формалашкан. Аны шушы микрорайонда яшәүче Илдар Шәрәфетдинов җитәкли. Бүген алар үзара салым программасының бар нечкәлекләрен яттан диярлек беләләр. Бу аңлашыла да, үзара салым җыю социаль мәсьәләләрне хәл иткәнен алар ачык күргән – бүген поселок эчендәге юллар төзек. Ә бер эл элек моны күз алдына да китереп булмый иде, диләр алар.
– Үзара салым җыю программасы барлыгын халык белән очрашкан вакытта район башлыгы Фаил Камаев аңлатты. Төшендек. Без аңлап алсак та, поселокта яшәүче кайберәүләргә өстәмә аңлатырга туры килде. Яшермим, бу программа эшләвенә ышанмаучылар да, шик белән караучылар да бар иде. Кемнең тик торганнан үз кесәсеннән акча чыгарып бирәсе килсен? Бәхеткә, ышанычлар акланды, – ди Илдар.
Әйтергә кирәк, 2018 елда Кече Шилнә халкы, беренче тапкыр референдумда катнашып, үзара салымны 1000 сумнан җыярга тавыш бирде. Манхэттенлылар, әлеге карарны хуплап, 2018 елда 895 мең сум акча җыйган. Дәүләт тарафыннан финанслангач, 4 млн 475 сум акча кайткан. Аны тулысынча юллар төзелешенә тотканнар: Виноградная урамында бетон юл салынган, Орхидейная урамында ком-таш түшәлгән, өлешчә асфальт җәелгән, Васильковая урамына илтүче юл да төзек – асфальт җәелгән.
– Шунысы сөенечле, район хакимияте, җирле үзидарә органнары безнең барлык мәнфәгатьләрне исәпкә алды. Акчаның тиененә кадәр кая тотылганын, нинди эшләр башкарылганын үзебез контрольдә тоттык. Каян нәрсәне түбәнрәк бәягә алып була, кайсы сыйфатлырак, кемнәр эшне намус белән башкарып чыга дигән сораулар турында да кат-кат киңәшләштек, – ди Илдар.
Быел да манхэттенлыларның планнары зурдан – юллар төзү, балалар мәйданчыгы урнаштыру һ.б.лар. Илдар Шәрәфетдинов сөйләвенчә, микрорайон көннән-көн үсә, хәл итәсе мәсьәләләр дә арта. Аныңча, һәрбер кешедән 1000 сум җыеп кына барлык проблемаларны хәл итеп булмый. Шуңа күрә быел алар бу сумманы арттыру яклы.
– Хәзер поселок халкында аңлау бар. Быел тагын да күбрәк салым җыеп, узган елгыдан да зуррак күләмле эшләр башкарачакбыз. Әлеге программа гына дәвамлы булсын. Шунысы гына кызганыч, үзара салым җыю турында алданрак белмәдек, 5 ел эчендә инде күпме эш башкарылган булыр иде! – ди Илдар Шәрәфетдинов.