Картлар hәм инвалидлар йортында Сабантуй үткәрделәр

Бәйрәмне оешманың директоры Лилия Хөсәенова ачты. Сабантуйга кунак итеп район башкарма комитеты җитәкчесе урынбасары Гөлнара Ганиева, ветераннар һәм инвалидлар советы рәисе Галимҗан Зарипов, социаль яклау бүлеге башлыгы Гөлнара Шәфыйкова, авыл җирлеге башлыгы Рамил Нәҗметдинов килгәннәр иде. Алар картлар йортында яшәүчеләргә үзләреннән бүләкләр дә бирделәр. Сабантуйның рәсми өлешеннән соң күңел ачулар башланды. Теләнче Тамак авылы мәдәният йорты хезмәткәрләре барысына да үз җырларын бүләк иттеләр. Картлар йортында яшәүчеләр үзләре дә бәйрәмдә бик теләп катнаштылар. Төрле уеннар уйнадылар, җырладылар, биеделәр, дип хәбәр итәләр картлар һәм инвалидлар йортыннан.