Гриппка каршы көрәш җәйдән үк башлана

Тукайлылар арасында авыруга каршы торучанлык формалашсын өчен бар халыкның 40 проценттан да ким булмаган өлешен вакцинацияләргә кирәк. Былтыр бу күрсәткеч үтәлгән. Быел да, сәламәтлек саклау учреждениеләренә тиешле препаратлар кайту белән, прививка ясатуны оештырырга кирәк булачак. Узган сезонда районда бер кеше грипп белән авырган булган, дип хәбәр итте Роспотребнадзор идарәсенең территориаль бүлеге җитәкчесе Роза Салихова. Әлеге авыру гриппка каршы прививка ясатмаган булган. Гомумән, вакцина ясаткан кеше авыруны өзлегүләрсез, җиңел формада уздыра, дип белдерә белгечләр. Шуңа күрә хроник авырулы кешеләрне, балаларны, өлкәннәрне үз сәламәтлекләренә аеруча игътибарлы булырга, авыруга каршы чараны алдан күрергә чакыралар.
Ә кошчылыкта эшләүчеләр бигрәк тә уяу булырга тиешләр. Аларның кимендә 75 процентына гриппка каршы прививка ясату зарур. Роспотребнадзор белгечләре исә 90 процентына ясау кирәк дип кисәтә.