Чаллыда суд приставлары әтисе алып киткән кызны әнисенә кайтарырга булышкан

Чаллыда суд приставлары хатынга элеккеге ире - баланың әтисе алып киткән кызын кайтарырга булышкан. Бу хакта «Татар-информ» мәгълүмат агентлыгына Россия Федераль суд приставлары хезмәтенең Татарстан буенча идарәсенең мәгълүмат чаралары белән хезмәттәшлек буенча баш эксперт-белгече Лилия Хәлимова хәбәр итте.

«Элеккеге ир белән хатын бала кем белән яшәргә тиешлеге турында килешә алмаган. Суд кызның яшәү урынын әнисе янында дип билгеләде. Әмма соңрак элеккеге ире баланы алып качып китә», - дип сөйләде Хәлимова.

Ир-ат бала белән эзләнүгә игълан ителгән. Якшәмбе көнне, 29 сентябрьдә, аларның урнашу урыны турында мәгълүмат килгән. Суд приставлары полиция хезмәткәрләре һәм опека белгечләре белән берлектә урынга барып, баланы алып, аны әнисенә тапшырган.