Чаллыда Россиядәге иң зур шугалак ачтылар

Чаллыда Россия территориясендәге иң зур шугалак ачтылар. Ул шәһәр ипподромы территориясендә ясалды. Бу хакта «Челнинские известия» газетасы яза.

Автошәһәр мэриясе матбугат хезмәте мәгълүматлары буенча, боз мәйданчыгы 28 мең квадрат метр мәйданны били.

Чаллы башкарма комитеты җитәкчесе Рамил Хәлимов киләсе елга шәһәр хакимияте ипподромда шугалакны көз көне үк ясый башлаячагын вәгъдә итте.

Шугалакка 10.00 сәгатьтән 22.00 сәгатькә кадәр килергә мөмкин. «Үз тимераякларың белән килергә кирәк, керү бушлай», – дип ачыклый басма.