Транспортының тавышы артык көчле булган тукайлыларны штрафка тарталар

Автотранспорт чараларының атмосфера һавасын пычратудан саклау максатыннан ТР буенча ЮХИДИ идарәсе Экология табигать ресурсларын саклау министрлыгы белән берлектә 1 июньнән 30 сентябрьгә кадәр «Чиста һава» дигән оператив-профилактик чара үткәрә. Бу чорда автотранспорт чараларыннан һавага тарала торган зарарлы матдәләрнең техник нормативларга туры килүе ЮХИДИ хезмәткәрләренең махсус контролендә булачак. Россия Федерациясенең дәүләт стандартлары белән билгеләнгән бу таләпләр үтәлмәгән очракта яки транспортның тавыш дәрәҗәсе нормативлардан югары булганда машина йөртүчеләр кисәтүгә яки 500 сум күләмендә административ штрафка тартыла, дип белдерә район буенча ЮХИДИ хезмәте.