Юлда калдырмадылар

Ташкичү авылында яшәүче Рифкать Гыймаев редакциягә шалтыратып юлда үзе белән булган хәл турында сөйләде. Рифкать Гыймаев УАЗ-Патриот машинасында Мусабай-Завод авылына барырга юлга чыга. «Сарман трассасында яхшы гына җилдереп килдем, Мусабай-Завод борылышында, нишләптер, машинам белән юл читенә төштем. Кар көрте сарган. Чыга алмыйм. Нәкъ шул вакытта, нәкъ шул урында юл эшләрен башкаручы КамАЗ үтеп бара. Эчемә җылы йөгерде: болай булгач КамАЗ мине тартып чыгара дип уйладым. Өметем акланмады. Юл чистартучы КамАЗ шоферы туктамады. Бер-бер артлы автомобильләр уза. Җиңел машинада баручы берничә йөртүче туктап ни булганлыгын белеште. Ләкин алар минем УАЗ-Патриотымны сөйрәп чыгара алмаячакларын аңлагач үз юлларын дәвам иттеләр. Шунда яшь кенә бер егет автомобилен туктатты да: «Абый, минем машина синекен тартып чыгара алмый. Кызыл Байракка кайтып «Нива»м белән киләм дә, тартып чыгарам», – дип күңелемдә өмет уятты. «Ә» дигәнче килеп тә җитте ул. Шуннан аңа ярдәмгә тагын бер егет кушылды. Икәүләп машиналары белән мине тартып чыгардылар бит! Мусабай-Завод авылына туганнарыма кайткач Кызыл Байрактан «Нива»сы белән килгән егетнең исемен белдем – Рамил Халит улы Вәлиев икән ул миһербанлы кеше. Рамилгә һәм исемен дә белмәгән икенче егеткә рәхмәтләрем чиксез», – ди Рифкать Гыймаев.