Күзләреңнән җемелдәшеп йолдызлар җиргә тамды

Ташкичү авылы китапханәсендә әдәби кичә үтте. Кичәгә «Шатлык» клубы әгъзалары җыелдылар. Бу юлы аларны Чаллыда һәм Тукай районында яшәүче һәм иҗат итүче шагыйрәләр белән таныштырдык. Сирень Якупова, Әлфия Ситдыйкова, Рәзинә Сәетгәрәева язган шигырьләр бөтен кешенең күңеленә хуш килде. Кичә дәвамында язучыларның тормыш юлы, иҗаты һәм яңа чыккан китаплары турында сөйләштек. Соңыннан һәр кеше үзе яраткан шигырьләрне укыды. Әлфия Галимованың әнисе Мәсһүдә апа язган үзенчәлекле шигырьләр истә калды. Дания Вәҗиева яраткан язучысының шигырьләрен бик моңлы һәм сәнгатьле итеп укыды. Әдәби кичә күңелле һәм җылы мохиттә үтте, дип яза Ташкичү авылы китапханәсе мөдире Светлана Мөхәммәтнәбиева.