Исеме җисеменә туры килсен!

Район халкы бу бәйгене хуплап кабул итте. Спортзалга исем бирү буенча редакциягә шалтыратулар булып тора. Түбән Суыксу авылында туып үскән һәм гомере буе район җирлегендә тырышып хезмәт куйган Наил Барый улы Арсланов та спортзалга исем бирүгә битараф калмаган. Тукай «Тепло-газ» ҖЧҖдә оператор булып эшләүче Наил Арсланов 5 исем тәкъдим итә. «Быел ТАССРның 100 еллыгын билгелибез. Бу – мөһим дата уңаеннан безнең авылдагы спортзалга «Ватан» дигән исем бирү кулай булыр. Спортзал нарат паркы янында төзелә, янәшә генә Наратъелга дигән күл җәйрәп ята. Шушы үзенчәлекләрне күздә тотып, «Наратлы» дигән исем дә күңелгә ятышлы. Спортзалга «Бөркет» дигән исем дә туры килә. Бөркет – иң көчле кош. Батыр, көчле кешеләрне юкка гына бөркетләргә тиңләмиләр. Спорт белән шөгыльләнгән кеше көчле, кыю була. «Заман» һәм «Нур» дигән исемнәр дә бик мәгънәле», – дигән фикерен белдерде ул.