21 сентябрь 2022 яңалыклары
-
ЮХИДИ хәбәр итә
2022 елның 20 сентябрендә Яр Чаллы-Сарман - Мусабай-Завод - Борды авылы автомобиль юлының өченче километрында юл-транспорт вакыйгасы булды. 2002 елда туган ир-ат LADA Kalina автомобилен йөртүче Кызыл Байрак авылы ягыннан хәрәкәт итә. Юллар киселешендә ул дөрес тизлек сайламый, нәтиҗәдә, юл читенә төшеп каплана.
-
Челтерәп ага чишмәсе!
Комсомол авыл җирлеге башкарма комитеты җирле чишмәне төзекләндерүгә алынды. Чишмә янындагы мәйдан балалар бакчасын төзекләндерүдән соң калган плитәләр белән түшәлгән. Биредә ял итү урыны төзегәннәр, ул бик матур һәм уңайлы.
-
Ләлә чәчәкләре утырттык
Әҗмәкәй авылында Бөек Ватан сугышы каһарманнарын искә алып, авыл уртасында торган һәйкәл янында ләлә чәчкәлере утырттылар. Түтәлне алдан ук Фәннүр Хәйретдинов сөреп, тырмап куйды. Шарт буенча орлыклардан (суганнардан) кып-кызыл чәчәкләр үсеп чыгарга тиеш. Ләлә чәчәге орлыкларын Әҗмәкәй халкы үзе алып килде. Кемдер Чаллы кибетләреннән, кайсыберләре ярминкәләрдән сатып алып кайтты, берләре үзләренең бакчасыннан казып алдылар. Авылдашыбыз Нәсимә Сәетгали кызы ләлә суганнарын Казан шәһәреннән җибәргән. Олылар да, кечеләр дә бик канәгать булды ул көнне. Соңыннан һәйкәл янына чәчәкләр салдык. Бергәләп авылыбызга багышланган җыр башкардык.
-
Урманчылар көненә чара
Кенәз авылы мәдәният йорты хезмәткәрләре балалар белән урман хезмәткәрләре көненә багышланган «Урман – табигатьнең бәяләп бетергесез бүләге» дигән танып белү сәгате үткәрделәр. Балалар төбәгебез табигатенең күптөрлелеге, урманнарда, табигатьтә көзен булган үзгәрешләр турында белделәр. Моннан тыш, балалар урманчы һөнәре белән таныштылар.
-
Безнекеләрне бел!
Тукай районы ЗАГС хезмәткәрләре «Татарстан Республикасында граждан хәле актларын дәүләт теркәвенә алу тантанасының иң яхшы алып баручысы» конкурсының зона этабында уңышлы чыгыш ясадылар.
-
Ярминкә мәйданы эш көннәрендә дә буш тормый
Яр Чаллы шәһәренең «Энергетик» мәдәният сарае каршындагы мәйданда көзге ярминкәләр дәвам итә. Авыл хуҗалыгы продукциясе белән актив сәүдә ял көннәрендә уза, әмма эш көннәрендә дә мәйдан буш тормый: көн саен авыл хуҗалыгы товарлары җитештерүчеләр сатып алучыларга үз продукциясен тәкъдим итә.