21 март 2022 яңалыклары
-
«Язгы каникуллар»
Район ЮХИДИ бүлеге 23 марттан 5 апрельгә кадәр «Язгы каникуллар» дип аталган профилактик чара үткәрә. Акция каникуллар вакытында балаларның юл-транспорт куркынычсызлыгын тәэмин итү максатыннан уздырыла. Чөнки балалар катнашындагы юл һәлакәтләре нәкъ менә аларның яллары вакытында ешая. Акция барышында балалар белән профилактик әңгәмәләр үткәрү, ата-аналар җыелышларында катнашу, «Бала – иң мөһим пассажир» чарасы кысаларында пассажир балаларны йөртүне тикшерү кебек мероприятиеләр каралган.
-
Җиңү шулай яуланды
Иске Дөреш мәдәният йортында Бөек Ватан сугышы ветераны, үзешчән фронтовик шагыйрь Усманов Хәниф абыйга багышланган “Җиңү шулай яуланды” дип исемләнгән кичә үтте. Кичәгә тормыш иптәше Усманова Мөнирә апа ( 94 яшь), сеңлесе Изилә апа, кызлары Роза апа һәм Фәридә апаларны кунак итеп чакырдык. Авылыбызның хөрмәтле кешеләре , бүгенгесе көндә лаеклы ялдагы тарих укытучысы Валиуллина Нурия апа һәм укытучы, озак еллар җирлек башлыгы булып эшләгән Валиуллин Гыйздулла абыйлар да кичәгә чакырулы иде. Бик күп еллар Иске Дөреш мәктәбендә авылыбыз тарих музеен җитәкләгән Нурия апа Бөек Ватан сугышы ветераннары Хәниф абый, Садыйк абый, Сергей абыйлардан сугыш турындагы истәлекләрен язуларын сорый һәм альбом итеп ясата.
-
Яз кызы – Нәүрүзбикә дә килеп җитәр!
Нәүрүз - яңа көн, язны каршылап, язгы чәчү эшләре алдыннан үткәрелә торган халык бәйрәме. Элекке заманнарда Нәүрүз көннәрендә, йорттан – йортка кереп, Нәүрүз әйтеп йөрү гадәте булган. Нәүрүз көнне көн белән төн тигезләшә. Шушы көннән соң көн озыная башлый. Тиздән җылы яклардан туган өйләренә кошлар да кайтыр, җирләр кардан ачылыр, үләннәр шытып чыгар, чәчәкләр калкыр, язгы кыр эшләре башланыр. Яз кызы – Нәүрүзбикә дә килеп җитәр!