Якты юл
  • Рус Тат
  • Яңа елның яңа штрафлары

    Узган елның 25 декабрендә кабул ителгән Федераль Закон нигезендә, Россия Федерациясенең Административ хокук бозулар турындагы кодексының юл хәрәкәте кагыйдәләренә кагылышлы өлешләренә кайбер үзгәрешләр кертелде һәм алар яңа елның 1 гыйнварыннан үз көченә керде. Шулай итеп, юл йөрү кагыйдәләрен бозган машина йөртүчеләр хәзер штрафларны башкачарак түли башлаячаклар. Бу турыда Татарстан Республикасы...

    Документларың тәртиптә булмаса - юлга кузгалма

    Административ хокук бозулар турындагы кодексының үзгәрешләр кертелгән 12.3 маддәсенең 1 өлеше буенча, транспорт чарасы белән идарә итәргә хокук бирүче һәм теркәү документлары булмаган килеш юлга кузгалган машина йөртүчегә кисәтү яисә 100 сум күләмендә штраф яный. Элек әлеге документлар исемлегенә машина белән идарә итәргә хокук бирүче ышаныч кәгазе дә керә иде.

    Каршы полосага чыкканда кагыйдә бозма

    12.15 маддәнең 3 өлеше буенча, каршылыкны әйләнеп үтү максатыннан кагыйдә бозып каршы юнәлештәге полосага яки трамвай юлына чыккан өчен 1000 сумнан башлап 1500 сумга кадәр административ штраф карала. Трамвай юлына чыккан өчен элек 4 айдан 6 айга кадәр машина йөртү хокукыннан коры калырга мөмкин иде. Кагыйдә бозуның шундый ук башка очракларында, 3 өлештән тыш, машина йөртүче 5000 сум штрафка тартыла яки 4 айдан 6 айга кадәр машина йөртү хокукыннан мәхрүм ителә.

    Шушы ук маддәгә 5 өлеш өстәлде. Ул түбәндәгечә бәян ителә: бу маддәнең 4 өлешендә каралган административ хокук бозуны бер ел эчендә яңадан кабатлаучыдан бер елга транспорт чаралары белән идарә итү хокукы алыначак. Шундый ук хокук бозу видеотеркәү җайланмалары аша ачыкланса, автомобиль хуҗасына 5000 сум күләмендә штраф түләргә дигән "бәхет хаты" киләчәк.

    Барсаң, дөрес юнәлештә бар

    Бер генә юнәлештәге юлдан каршыга таба хәрәкәт итеп, ЮХИДИ инспекторлары кулына эләксәң, һәм бу рәвешле кагыйдә бозу бер ел эчендә икенче мәртәбә кабатланса, 12.16 маддәнең яңа өстәлгән 3.1 өлеше буенча шулай ук бер елга хокуктан мәхрүм ителәсең. Ә инде видеокамерага туры килсәң 5000 сум штраф белән котыласың.

    ОСАГО полисында исемең язылмаса, номерсыз каласың

    Административ хокук бозулар кодексындагы тагын бер үзгәреш ОСАГО полисына кагыла. Транспорт чарасыннан файдалануга хокукы булмаган, ягъни ОСАГО полисында фамилиясе язылмаган машина йөртүче хәзер элеккеге кебек 300 сум штраф белән генә котылып кала алмаячак. Полиссыз йөргән өчен элек нинди җәза кулланылган булса - полиста исемең теркәлмәгән икән, шундый ук административ җәза биреләчәк. Ягъни транспорт чарасының дәүләт номерлары салдырылачак, һәм, әлбәттә инде, җитешсезлекне төзәткәнчегә кадәр бу машина белән йөреп булмаячак. Әлеге үзгәреш турында Административ хокук бозулар турындагы кодексының 12.37 маддәсенең 1 өлешендә әйтелә.

    Иң мөһим һәм кызыклы язмаларны Татмедиа Telegram-каналында укыгыз


    Теги: штраф
    Нравится
    Поделиться:
    Реклама
    Комментарии (0)
    Осталось символов: