Тугыз ай эчендә бер авылдан өч кеше ВИЧ инфекциясен йоктырган

Район үзәк больницасының баш табибы Галим Сабирҗановның хакимияттә үткән атналык киңәшмәдә хәбәр итүенчә, СПИД йоктыручылар районда быел кискен арткан. Гыйнвар аенда ВИЧ-инфекцияле 31 кеше исәптә торса, 1 октябрьгә ул сан 47гә җиткән. Бу чорда чирне беренче тапкыр йоктыруның 11 очрагы теркәлгән, шундый диагноз куелган 5 кеше исә районга читтән күченеп килгән. ВИЧ-инфекциялеләрнең 9ы бүген Круглое Поледа, 12се Бәткедә яши. Әлеге куркыныч чирне йоктыру буенча быел Яңа поселогы "рекорд куйган" - ел башыннан алып анда 3 кеше исәпкә баскан.