Кипкән җимеш файдалы

Кара җимеш

Эч катудан тилмерүчеләр көнне кара җимештән башларга тиеш. Аңарда калий күп, шунлыктан ул организмнан артык суны чыгарырга ярдәм итә, гипертониядән булыша һәм бөерләр эшчәнлеген яхшырта.

Өрек

Өректә йөрәк эшчәнлегенә кирәк булган калий бик күп. Шунлыктан ул йөрәк ритмы бозылганда, стенокардия, кан әйләнеше начар булганда, шешенүдән тилмерүчеләр өчен дару буларак кулланыла ала. Бәвел куу үзлегенә ия препаратлар кулланучылар да өреккә өстенлек бирергә тиеш. Гадәттә, аны инфаркттан тернәкләнеп килүчеләрнең рационына кертәләр. Составында тимер күп булу сәбәпле, азканлылыктан интегүчеләр өчен дә файдалы.

Йөзем

Кипкән виноград (йөзем) йөрәк-кан тамырлары системасын ныгыта. Соңгы тикшеренүләр аның нерв күзәнәкләрен саклавын да исбатлаган. Моннан тыш йөземдә бик сирәк очрый торган микроэлемент - бром бар. Ә ул исә остеопорозны кисәтү һәм дәвалау өчен крәк.

Йөземнең һәр төренең үз сыйфаты:

- киш-миш (төшсез йөзем) - калийга бай;

- ак йөзем ашказаны һәм эчәк өчен файдалы;

- караңгы төстәге «Изабелла» сортлы йөземдә кан әйләнешен яхшыртучы рубидий элементы бар. Ул кан тамырларын атеросклероз төерләреннән чистарта.

Инҗир

Кан тамырларында тромблар барлыкка килү куркынычы булганда, инҗир ярдәмгә килә. Ул шулай ук аритмия, бронхиаль астмадан тилмерүчеләр өчен файдалы, моннан тыш бәвел кудыру үзлегенә ия. Инҗир шеш үсүгә каршы тора, эчәктәге паразитларны үтерә, коры ютәлне бетерә. Ютәлне дәвалау өчен берничә инҗирне кайнар сөткә салып җебетәсе. Аннан иләк аша сөзеп, җылы килеш көнгә 3-4 тапкыр 0,5әр стакан эчәләр.

Слива

Анда каротин һәм пектин күп. Беренчесе вируслар һәм бактерияләргә каршы көрәшә, күз күремен яхшырта, пектинлы матдәләр исә эчәклек эшчәнлеген җайга сала, организмнан холестеринны чыгарырга ярдәм итә.