Иң мөһиме – үстерелгән ашлыкны, бөртеген дә югалтмыйча, кыска вакытта җыеп алу

Җиңел кулдан дигәндәй, алтынга тиң минутларны әрәм итмичә, уракка быел, беренчеләрдән булып, «Миңнеханов» крестьян-фермер хуҗалыгы игенчеләре кереште. Алар якшәмбе көнне көзге бодайны суктыра башлады. Сишәмбе көнне без үзебез «Миңнеханов» крестьян-фермер хуҗалыгында булдык. Техника гөрелтесенә күмелгән басу янында безне хуҗалык җитәкчесе Минталип Миңнеханов каршы алды.

- Көзге бодай 90 гектар мәйданны били. Бүгенге көндә шуның 18 гектарын урып-суктырдык. Гектарыннан 40 центнердан артык уңыш чыга. Булачак уңыш язмышы аны тиз һәм иң мөһиме - сыйфатлы җыеп алуга бәйле. Урып-җыю эшләрен вакытында төгәлләү өчен, эшчеләрнең эшне тиз тотуы, уңай һава торышының һәр мизгеленнән файдаланып калу таләп ителә. Механизаторларыбызга килгәндә, алар барысы да ышанычлы, тел-теш тидерерлек түгел. Әйтик, Фәрхәт Хәсәнов - безнең комбайнчы. Үзегез күргәнчә, кырда ул куәтле ашлык җыю техникасы «Палессе GS12»не иярли. Әнә йөк машинасында йөрүче Ришат Шәйдуллин да кайтып җитте.

Урып-җыюда катнашучыларның барысы да җитди, эшләреннән бүленеп, килгәннәр белән сөйләшергә дә бик атлыгып тормыйлар. Комбайнчылар да, шоферлар да гәрәбәдәй бөртекләрнең әрәм-шәрәм булуына юл куярга тиеш түгел. Аларның хезмәтенә күп нәрсә бәйле.

- Шушы 18 гектардан җыеп алынган 870 центнер бодай амбарга кайтарылды һәм тулысынча беренче эшкәртүне узды. Әлеге бодайларны хуҗалык белән идарә итүче улым - Рамис Миңнеханов - ашлык кабул итү пунктына озатты инде. Эш барышына килгәндә, шуны әйтәсе килә: егетләрнең кәефе шәп, уңыш та мул булыр дип көтәбез. Амбарга кергән ашлык күрсәткеченнән соң гына барлык эшебезгә нәтиҗә ясап булыр, - дип сөйләде хуҗалык житәкчесе Минталип Миңнеханов.