Авылым, кешеләрең синең рубрикасы буенча яңалыклар

• 01 март 2020

  Табиб булып туган

  Кнәз һәм Күзкәй авыл җирлегендә яшәүчеләр Татарстан амбулаториясе баш табибы, гомуми практика табибы Рифгать Нәҗип улы Юмаев хакында зур горурлык белән: «Безнең Юмаев табиб булып туган», – диләр. Шушы бер җөмлә кеше буларак та, табиб буларак та Рифгать Юмаевның чын асылын аңлата. 

  
• 26 февраль 2020

  Районның чын патриоты иде

  Район оешкан 1976 елдан партия район комитетының пропаганда һәм агитация бүлеген җитәкләгән, аннары партия район комитетының өченче секретаре булып эшләгән абруйлы зат, районның легендар шәхесе Фәймә Гарифулла кызы Гыйниятуллина арабыздан китте. Район халкы аны 23 февраль көнне соңгы юлга озатты. Язмышлардан узмыш юк, диюләре хактыр, заманында районыбызның «баш идеологы» булган эшсөяр җан әнә шулай көтмәгәндә якты дөньядан китеп барды. Күпләрне, бик күпләрне хәсрәткә салып, сагыш калдырып китте ул.

  
• 25 февраль 2020

  Җәйләрдән күчкән матурлык

  Кеше мәгарәдә, тау куышларында яшәгән чорда ук тормыш-яшәешен күпмедер дәрәҗәдә матурларга тырышкан. Мәгарә, куышларын ямьләндерү максатыннан кипкән яфрак-чәчәкләр һәм болан-пошиларның челтәр мөгезләрен табигый бизәү чарасы итеп кулланган. Хәзерге заманда йортларны бизәүдә югары сәнгать үрнәкләре тудыру өчен бөтен мөмкинлекләр дә бар. Калмашта яшәүче Миңлия белән Ринат Фәхриевләр гаиләсе йортның эчен һәм тышын, тирә-юньне матур итү өчен төрле технологияләр кулланалар. 

  
• 18 февраль 2020

  Хисаметдин бабай белән горурланабыз

  Яңа Сарайлы авылында гомер итүче Бөек Ватан сугышы ветераны, авылыбызның мөхтәрәм һәм хөрмәтле кешесе Хисаметдин Садриев олуг юбилеен – 95 яшь тулган көнен билгеләп үтте. Юбилярны бу истәлекле дата белән котларга район һәм авыл җитәкчелеге дә килде. Хисаметдин аганы тәбрикләп, ил Президентының котлау открыткасын һәм истәлекле бүләк тапшырдылар, юбилярның алга таба да тыныч картлыкта яшәвен, балаларының, оныкларның, оныкчыкларының кадер-хөрмәтен күреп, бәхетле гомер кичерүен теләделәр.

  
• 17 февраль 2020

  Финансист хуҗалыкчыл булырга тиеш

  «Финансистта хуҗа була белү сәләте булырга тиеш», – ди районның финанс-бюджет палатасы баш белгече Тамара Атанова. Ул районның салым, финанс структураларында 27 елдан артык хезмәт куя. Кайда гына эшләмәсен, Тамара Григорьевна үзен яхшы белгеч, намуслы хезмәткәр һәм бернәрсәгә дә битараф калмый торган кешелекле ханым буларак хөрмәт казана. Шуңа күрә дә аның эшен җитәкчелек тә, хезмәттәшләре дә югары бәяли. Хөкүмәтебез тарафыннан да аның хезмәтләре бәяләнә – үткән ел ТР Финанс министрлыгының Почет грамотасы белән бүләкләнде. Тамара Атанова уңышка ирешүенең сәбәбен гади генә итеп: «Эшкә зур теләк белән барам һәм башкара торган хезмәтемне бик яратам», – ди. 

  
• 15 февраль 2020

  Хатлар саргая...  Тормыш дәвам итә 

  Вера Петровна белән Александр Семенович алтмыш елдан артык тормыш диңгезендә бергә йөзәләр. Алар – бик сирәкләр өлешенә тигән олы бәхеткә ия парлар. Поповлар күптән түгел бриллиант туйларын үткәрделәр. 

  
• 31 гыйнвар 2020

  Сугыш уты өткән буын 

  «Мин, Нәзилә Гайнетдин кызы, 1930 елның 20 апрелендә Минзәлә районы Күзкәй авылында крестьян гаиләсендә баш бала булып дөньяга килгәнмен. 11 яшем тулганчы бик бәхетле яшәдем. 3нче классны тәмамлавым 1941 елга туры килде. Иртәнге якта, коедан су алган чагым иде, кемнеңдер авыл урамы буенча: «Сугыш! Герман сугыш башлаган!» – дип атта чапканы хәтердә. Авылдашлар өйләреннән чыга, кемдер елый, кемдер сугышны каргый. Мәктәптә, өч көн рәттән аңлату эшләре алып бардылар. Аннан инде көн саен ир-атлар сугышка китә башлады. Әткәй, Гайнетдин Бәшәров, август аенда лобогрейка (уру җайланмасы) белән урак ура башлаган гына иде, энесе Әгъләметдин абый белән икесен дә фронтка җибәрделәр. Әткәй урынына лобогрейкада сеңелесе Наибә калды. Әткәйләрне башта Суслонгерда тоталар. Алты айдан соң фронтка алалар.

  
• 30 гыйнвар 2020

  Авылым батырларын барлый

  Быел 27 гыйнвар көнне Ленинград блокадасы өзелүгә 76 ел булды. 1925 елда Боерган авылында туган сугыш ветераны Кыяметдин Минһаҗетдин улы Минһаҗев Ленинград блокадасын өзүдә катнашкан. Күрсәткән батырлыгы өчен 1942 елның 22 декабрендә «Ленинград оборонасы өчен» медале белән бүләкләнә. Изге җиребезне илбасарлардан саклап калган, аның иминлеге өчен гомерләрен дә кызганмаган каһарманнар рухлары алдында хөрмәт белән баш иябез, күңелләрдә истәлекләрен яңартабыз. 1945 елның февралендә яраланып авылга кайткан, янар йөрәкле, җырга моңга сәләтле, гаярь солдат үзенең гаилә тормышын да кыю гамәлдән башлый. Мал табибәсе булып эшләгән Наҗия исемле чибәр кызны урлап алып кайта. Алар бик матур итеп яшәп китәләр, 7 бала тәрбияләп үстерәләр.

  
• 28 гыйнвар 2020

  Оргыды мулласы

  Авылны, аның халкын бик яратам. Ял көннәре җитүгә, Оргыды, Иске Абдул, Иректаң, Казиле авылларына, Татарстан, «Сосновобор» бистәләренә юл тотам. Чираттагы язмам авылдашым, Оргыды авылының лаеклы кешесе – Әмирҗан Галимҗан улы Галимҗанов турында. 

  
• 28 гыйнвар 2020

  Сыналсак та, сынмадык – нык булдык

  Быел, ямьле май аенда, Бөек Җиңүнең 75 еллыгын бәйрәм итәчәкбез. Илебездә шушы мөкатдәс бәйрәмгә әзерлек зур колач белән бара. Хөкүмәтебез тарафыннан Бөек Ватан сугышы ветераннарына кадер-хөрмәт күрсәтелә. Бу – сөенечле хәл. Зур югалтулар, кайгы-хәсрәт һәм ачы күз яшьләре китергән коточкыч сугыш елларында тылда авыр хезмәт башкарган яшүсмерләр – сугыш чоры балалары да Бөек Җиңүне якынайтуда зур өлеш керттеләр. Хәзергесе вакытта алар өлкән яшьтәге кешеләр, күпчелеге – хезмәт ветераны. Тылда Бөек Җиңүне якынайткан, сынауларда сынмаган өлкән буын вәкилләренә кадер-хөрмәт күрсәтү, аларның хезмәтен тиешенчә бәяләү – изге бурычыбыз. 

  
• 19 гыйнвар 2020

  Агачтан могҗиза тудыручы

  Аның остаханәсенә килеп кергәч, биредә чын иҗат мәйданы икәнен сизәсең: пөхтә итеп төрле эш кораллары, нәни станнар тезеп куелган, өстәлләрдә ясалачак әйберләрнең детальләре, бер киштәдә төрле төстәге буяулар, лаклар, җилем һәм башка вак-төяк кирәк-яраклар. Әзер шахмат тактасы, аңа агачтан микроскоп төгәллеге белән зурайтып эшләнгән шахмат фигуралары тезелгән. Борынгы нәкышләр төшерелгән кувшиннар, зур төгәллек белән агачтан ясалган төрле җәнлек фигуралары. Икмәк саклый торган тартманы гына күр! Ә менә бу искиткеч матур хатын-кыз сынын автор «Сөембикә» дип атаган. Кыскасы, кечкенә генә остаханәдә үзе бер әкияти дөнья. Шуңа игътибар итәм: оста, картина язамы, агач фигуралар ясыймы, аның иҗат табышларында яшел, алтынсу якты төсләр өстенлек итә. Ә бу хыялый дөньяның тылсымлы куллы хуҗасы – Рөстәм Ясәвиев.

  
• 17 гыйнвар 2020

  Рәсим Шәйхаттаров:  «Мин йөгерәм, минем арттан башкалар йөгерә...» 

  Бу дөньяга һәркем үз язмышы белән килә. Кемгәдер Аллаһы Тәгалә күпләп акыл-талант, кемгәдер искиткеч кыяфәт, кемгәдер ул мулдан лидерлык сыйфатларын бирә. Шушы сыйфатларның берьюлы барысын да үзендә туплаган кешеләр дә бар. Районыбызда танылган шәхес, «Ярыш» җаваплылыгы чикле җәмгыяте җитәкчесе Рәсим Мансур улы Шәйхаттаров шундыйлардан. Дистә еллар инде аның һәр көне иртә таңнан аягына итек киеп, басу-кырларны әйләнеп кайтудан башлана. Шундый олы хуҗалык белән җитәкчелек иткәч, әлбәттә инде, син башкалардан алдарак йөрергә, барысын да белеп, үз күзләрең белән күреп торырга тиеш, ди ул. Эшне оештыра белү, кешеләр күңеленә юл табу – шулдыр ул лидер кешенең мөһим сыйфатлары. Юкка гына аның турында яратып, Җир улы ул, димиләр.

  
• 13 гыйнвар 2020

  Салмадым башымны салларга

  Моннан нәкъ егерме ел элек төргәге белән төрле төстәге чигү җепләре алып кайта ул. Бусы, якуттай янып торганы, мәк чәчәгенә әйләнер, монысыннан, шәмәхә төслесеннән, миләүшәләр «үсеп чыгар». Халисә ханым үзе үстергән каз-үрдәк мамыгыннан ясалган ап-ак мендәрләрен күпертеп кабарта да, күңеленнән генә кайда нинди чәчәк чигәчәген барлый. Кичләрен, йорт мәшәкатьләреннән бераз арынганнан соң, ап-ак тукымада берсеннән-берсе матур чәчәкләр, Ык буенда, әрәмәдә үскән бөрлегән-карлыганнар, кура җиләкләре пәйда була. 

  
• 11 гыйнвар 2020

  Илназ Рамазанов: «Мин үз районымның патриоты»

  Күп тапкырлар Сабан туе батыры булган, дәрәҗәле турнирларда кубок һәм медальләр откан Биклән егете Илназ Рамазановка нибары 18 яшь. Бүген ул Тукай районының атаклы спортчылары исемлеген җитәкли.  Ир-атларга гына хас үҗәтлек, тырышлык сыйфатлары булган чемпион белән без дә очраштык.

  
• 11 гыйнвар 2020

  Бар хикмәт олы йөрәкле булуда

  Ачык йөзле, тәмле сүзле, үзенә тартып торучы кешеләр бик сирәк алар. Ә дөньяның төрле ягын күреп, тормышның ачысын-төчесен татып, утлар-сулар кичеп, тормышның, һәр көннең, һәр мизгелнең, туганнар-якыннарның һәм иң затлысы – икмәкнең чын-чынлап кадерен белеп яшәгән өлкән кешеләр – ветераннарыбыз исә елдан-ел сирәгәя бара. Шундый олуг хөрмәткә лаек ветераннарның берсе – Биклән авылыннан Мөнирә Бәхтегәрәй кызы Бәхтегәрәева.  Ул 2019 елны үзенең зур юбилеен каршы алу тантанасы белән тәмамлады. Яңа елга бер көн кала ул 95 яшен тутырды. Шундый авырлыклар кичеп, дошман белән күзгә-күз очрашып та, бу яшькә җитү ул зур могҗизага тиң, әлбәттә.