Пилотсыз системалар гаскәрләрендә хезмәт итүчеләрне башка гаскәрләргә күчермиләр

Пилотсыз системалар гаскәрләрендә вазифалар дрон операторлары белән генә чикләнми. Биредә шулай ук машина йөртүчеләр, тәэмин итү хезмәткәрләре, склад белгечләре, инженерлар һәм башка техник юнәлеш вәкилләре дә хезмәт итә. Әмма нинди вазифа башкаруына карамастан, хәрбиләр шушы частьләрдән башка гаскәрләргә җибәрелми.

Татарстанда контракт төзүчеләр өчен бер тапкыр бирелә торган түләү күләме 2,9 миллион сумга җитә. Аның 2,5 миллион сумы республика бюджетыннан бүленсә, калган 400 мең сумын РФ Саклану министрлыгы түли.

Контракт нигезендә хезмәт итүчеләргә киң социаль ярдәм чаралары тәкъдим ителә. Алар арасында хәрби хәрәкәтләр ветераны статусы, айлык өстәмә түләүләр, гомер һәм сәламәтлекне иминиятләштерү, шулай ук бушлай медицина ярдәме алу мөмкинлеге бар. Барлыгы өч меңнән артык ташлама гамәлдә.

Дәүләт ярдәме хәрбиләрнең гаиләләренә дә кагыла. Балалар өчен югары уку йортларында бюджет урыннары, түләүсез түгәрәкләр һәм спорт секцияләре, җәмәгать транспортыннан файдалану буенча ташламалар һәм башка социаль гарантияләр каралган.

Пилотсыз системалар гаскәрләрендә хезмәт итәргә теләүчеләр 117 номеры буенча эшләүче махсус кайнар линиягә мөрәҗәгать итә ала. Шалтырату вакытында 4 төймәсен сайларга кирәк. Беренчел таләпләргә туры килгән кандидатларның мәгълүматлары сайлап алу белгечләренә җибәрелә.

Әлеге гаскәрләр составындагы хәрбиләр һавада, җирдә һәм суда кулланыла торган пилотсыз техника белән эшләячәк. Алар арасында төрле типтагы дроннар, чылбырлы пилотсыз платформалар һәм экипажсыз катерлар да бар.

Контракт шартларының төп үзенчәлекләренең берсе – хезмәт срогының автомат рәвештә озайтылмавы. Контрактның минималь вакыты бер ел тәшкил итә, ә башлангыч әзерлек кимендә ике ай дәвам итә һәм Татарстан белән күрше төбәкләрдә үткәрелә.

Фото: © «Татар-информ», Михаил Захаров

Мәгълүмат Татар-информнан алынды