Анна Филипповна Ларионова 99 яшен билгеләп үтте

Бер гасырга якын гомер юлы — ул гади саннар гына түгел, ә тырыш хезмәт, ныклы ихтыяр көче, кешеләргә карата ихлас кайгыртучанлык һәм күңел җылылыгы белән сугарылган зур тормыш тәҗрибәсе.

Юбилярны әлеге күркәм дата белән котларга хөрмәтле кунаклар да килде. Алар арасында район ветераннар советы рәисе Фәйрүзә Вәҗиева һәм «Шәфкать» халыкка социаль хезмәт күрсәтү үзәгенең өйдә хезмәт күрсәтү бүлеге мөдире Гөлнур Исмагыйлова бар иде.

Кунаклар Анна Филипповнага ихлас котлау сүзләрен җиткереп, аңа ныклы сәламәтлек, күңел көрлеге һәм озын гомер теләделәр. Шулай ук аның бай тормыш юлы, зирәклеге һәм тирә-юньдәгеләргә үрнәк булырлык оптимизмы өчен рәхмәт белдерделәр. Җылы, ихлас мохиттә юбилярга истәлекле бүләкләр дә тапшырылды.

Очрашу барышында Анна Филипповна кебек кешеләрнең район өчен чын байлык булуы ассызыкланды. Аларның тормыш тәҗрибәсе, хезмәт сөючәнлеге һәм рух ныклыгы яшь буын өчен үрнәк булып тора.