Эчкән килеш машина йөртүчеләрне ачыклыйлар

Бүген юл хәрәкәтендә кагыйдәләрне үтәп йөрүче, аек хәлдәге, тотрыклы психикалы машина йөртүчеләргә дә кыенга туры килә башлады. Руль артында утырган исерек йөртүченең нинди гамәлләр кыласын беркем дә күз алдына китерә алмый. Мондый очракларда хәтта транспорт йөртү тәҗрибәсе бик зур булганнар да каушап калалар. Эчкән килеш руль артына утыру бәла генә түгел, ул куркыныч афәт, фаҗига. Әлеге проблеманы административ җәзалар белән генә хәл итеп бетерү мөмкин түгел, бу очракта профилактик чаралар бик мөһим, диләр юл хәрәкәте иминлеге хезмәткәрләре.

Ел башыннан алып бүгенге көнгә кадәр район буенча ЮХИДИ бүлегенең юл-патруль хезмәте инспекторлары эчкән килеш руль артына утырган 33 машина йөртүчене тоткарлаган. Узган ел бу чорга ул сан 24 булган. Быел тоткарланганнарның 17се Тукай районында яшәүчеләр. 2012 елда исерек машина йөртүчеләр аркасында район юлларында 8 һәлакәт булган. Аларда 6 кешенең гомере өзелгән, 14 кеше төрле дәрәҗәдә тән җәрәхәтләре алган. Ә 2013 ел башыннан алкоголь кулланган машина йөртүче аркасында 1 юл-транспорт фаҗигасе килеп чыккан. Анда 1 кеше үлгән, 3 кеше зыян күргән. Җәрәхәтләр алучыларның берсе балигъ булмаган пассажир.

Инспекторлар машина йөртүчеләрне юлда туктатып тикшерәләр икән, руль артындагылар моны аңларга тырышсыннар иде. Мондый профилактик чаралар халыкның куркынычсызлыгын саклау максатында үткәрелә, дип белдерә район ЮХИДИ бүлеге.